احدث قصائد الشاعر نايف

رجع يسأل عن أخباري بعـد غيبـة سنـه وشهريـن ** رجع شايل وجـع صـدره وقـال أرجـوك واسينـي

رجـع كنـه يحسبنـي سعيـد بدنيـتـي أو زيــن ** و أهـو مـا يـدري الدمعـة لـو تراخـت تسلينـي

دمع هالوجـه .. كنـه جمـع فـي غيبتـه جرحيـن ** و أنا عينـي بـدت تدمـع علـى حزنـه وتبكينـي..

يقـول الدنيـا خانتنـي وبعـدك يـا صقـر سكيـن ** و لا أحدن يـا صقـر غيـرك يقدرنـي ويراعينـي

حبيبي ضقـت بغيابـك حبيبـي حيـل أنـا مسكيـن ** و أنـا جيـتـك بهاليـلـه و تكـفـى لا تخليـنـي

و أنا.. لامن نطق تكفى عطيتـه لـو طلـب هلعيـن ** و أجـود بكـل مـا يملـك خفوقـي وتملـك أيدينـي

وقلت: ابشر ولا يهمـك تدلـل وش تبـي يـا زيـن ** ترانـي فـدوه عيونـك لـو أنـك جيـت تشقيـنـي

حبيبـي لـو تبـي ألقمـره عطيتـك فوقهـا ثنتيـن ** بعد لو تطلـب النجمـة أبنطـق جيتـك أضـو ينـي

بعد هذا ضحك و..بعثـرت همومـه سلهـم الرمشيـن ** وقـال: الله يـا الطيـب وأنـا ظنـيـت ناسيـنـي

صراحة..حيل تحرجني يا طيب يـا أطيـب الغالييـن ** و لا ادري كيـف بوفيلـك حبيبـي وأنـت تعطينـي

بعـد هـذا تسامرنـا وتواعـدنـا بـعـد يومـيـن ** ووصيتـه علـى قلبـي وهـو مثـلـي يوصيـنـي

تواعدنـا علـى الجمعـة ولا جانـي إلـى الاثنـيـن ** ومـر أسبـوع والثانـي وشوقـي يشتـعـل فيـنـي

تصدق عـاد يـا سامـع!! ولا جانـي اليـن الحيـن ** وقبل تسـأل عـن أسبابـه بجـاوب وأنـت واسينـي

لأنه مـات فـي حـادث و أنـا مـت بغيابـه ليـن ** عرفت إني كذا ببقي ولا أحـد يقـوى يحيينـي